PAI Northern Thai Kitchen

🌶️ PAI Northern Thai Kitchen｜Toronto 食評

原本今次係想約另一間 PAI，點知嗰間太 full booking，最後就 book 咗呢間 PAI Northern Thai Kitchen。之前都有朋友推介過話幾好食，所以今次就同兩個朋友，三個女仔一齊去試下～🇹🇭 我哋嗰日其實都幾攰，又超級肚餓😂，所以三個人一口氣叫咗好多嘢！ 🍛 青咖喱飯 $25 呢個真係幾好食！咖喱味好香，食落好濃郁但又唔會太膩，配飯一齊食好滿足。尤其係佢配嗰份Jasmine rice，好似用荷葉之類嘅葉包住蒸，所以一打開已經有陣好香嘅葉香味，連飯本身都特別香！ 呢個細節我覺得幾加分。整體係一個我會覺得高過一般水準嘅青咖喱。 🍲 STARTER BOWL of 冬陰功 $10 酸酸辣辣，好開胃，味道幾有層次。嗰日我哋本身已經好肚餓，所以飲幾啖之後更加開胃🤣。 🍜 Pad See Ew $24.25 呢個都係好食到我幾驚喜嘅一道！炒得幾香，味道濃郁但唔會過份，整體口感都幾好。係屬於一食就會覺得「嗯，呢間真係有啲料」嗰種。 🥭 芒果沙律 $19.75 呢個就比較清爽，酸酸甜甜，好適合配住其他濃味嘅嘢一齊食。食到中間會覺得幾refreshing。 🐷 Moo Ping $17/ 3 Skewers 呢個真係幾惹味！甜甜鹹鹹又有少少焦香。一上到台，我哋三個即刻清晒😂 🥭 芒果糯米飯 $15 甜品方面就叫咗芒果糯米飯，整體都幾穩陣，甜度適中，食完辣嘢之後食返啲甜品幾舒服。 ✨ 整體感覺 今次其實真係幾 surprise！我哋叫咗咁多樣，基本上每一樣都非常好食，而且全部都高過平均水平。 但反而因為每一道都好食，我食完反而好難揀邊一樣係最突出😂。整體水準就真係幾高。完全明白點解呢間會咁出名，同埋有咁多人推介。 唯一比較可惜係，我覺得份量有少少細。我哋三個女仔嗰日又特別肚餓，所以叫咗好多樣先覺得夠食。加上以呢個價錢嚟講，我會覺得性價比唔算特別高。 🏠 環境 餐廳環境都幾特別，有一種比較少見嘅北部泰國風格，唔係一般泰國餐廳嗰種感覺，成個氛圍都幾有特色。 ⏰ 上菜速度 不過上菜就真係比較慢，我哋當日等咗差唔多20幾分鐘先有第一道菜上嚟。嗰陣三個人已經餓到不得了，所以等嘅時間就覺得更加長😂。 💭 總結 總體嚟講，我真係明白點解 PAI 咁出名。雖然價錢對份量嚟講有少少貴，上菜速度亦比較慢，但食物真係非常之好食，基本上每一道都冇令人失望。 如果下次再有機會去Toronto，我會想再食！不過下一次就想試下佢哋嘅主店，睇下同 Northern Thai Kitchen 比起嚟又會有咩唔同～🇹🇭